Yvette Leroy: Manman Ayiti

Ayiti manman zantray,
Ki lè w’ ap sòti anba tray.
Yo di ou pran sèt so, twa bitay,
Men jodiya ou kanpe sou fay.

Tankou yon bato san gouvènay,
Vag lanmè ap brote ak pay.
Pwoblèm ou piwo mòn layay,
Rèv ou kloure dèzè pòtay.

Devan dèyè ou nan batay,
Ou avòte anba mitray.
San w’ debòde rive sou ray,
Pòtre figi w’ kraze anba kay.

Ayiti pa pran nan kamouflay,
Pa ret chita gade fetay.
Kole pyese soude tout may,
Pa bay piyay, ni gaspiyay.

Ou fin kriye nan finiray,
Mare mouka w’ kon evantay.
Ak bèl kolye, zanno koray,
Pou kadanse nan rabòday…

Miami, Florida, September 17, 2011

*   *   *

Yvette Leroy, aka Wanègès, lives in Miami, Florida.